Tourism Center (Filipino)

Republika Ng Pilipinas
KAPULUNGAN NG MGA KINATAWAN
Quezon City, Manila

IKA-14 NA KONGRESO
UNANG REGULAR NA SESYON

PANUKALANG-BATAS BLG______
______________________________________________________________________

Panukala ni Kgg. Eduardo Nonato N. Joson
______________________________________________________________________

PALIWANAG


Nais ng mungkahing batas na itong maglaan ng Limang Milyong Piso (Php5,000,000.00) para sa konstruksiyon ng mga tourism centers sa Unang Distrito ng Nueva Ecija, partikular sa mga bayan ng Aliaga, Guimba, Licab, Cuyapo, Nampicuan, Sto. Domingo, Zaragosa, Quezon at Talavera.

Nauunawaan ng awtor na ang paglahok ng ng mamamayan sa mga produktibong gawain tulad ng isports at gawaing sosyo-kultural ay malaki ang maitutulong sa kanilang kasiyahan at pagtugon sa mga problema tulad ng adiksiyon sa droga at menor na krimen. Nagtataguyod ang gayong mga gawain ng kalahatang kalusugan, pisikal at mental, nagpapatimo ng halagahang moral at panlipunan, bukod sa naglalaan ng pagkakataon para mahikayat ang pagkamalikhain at diwa ng kooperasyon ng tao.

Ang paglalaan ng mga tourism centers ay karapat-dapat dahil ang ibubunga ng mga gawaing ito ay lagpas sa halagang pansalapi lamang. Sa dulo, makikinabang ang bansa natin sa mga proyektong nagtataguyod ng kasiyahan at pagkaproduktibo ng mga mamamayan sa pamamagitan ng paghikayat sa kanilang lumahok sa mga gawaing publiko at sibil.

Ang pagpasa ng panukalang batas na ito ay hinihiling.




EDUARDO NONATO N. JOSON











Republika Ng Pilipinas
KAPULUNGAN NG MGA KINATAWAN
Quezon City, Manila

IKA-14 NA KONGRESO
UNANG REGULAR NA SESYON

PANUKALANG-BATAS BLG______
______________________________________________________________________

Panukala ni Kgg. Eduardo Nonato N. Joson
______________________________________________________________________

ISANG BATAS NA NAGLALAAN NG KONSTRUKSIYON NG MGA TOURISM CENTERS SA UNANG DISTRITO NG NUEVA ECIJA AT PAGLALAAN NG PONDO PARA DITO

Hayaang pagpasiyahan ng Senado at ng Mababang Kapulungan ng Pilipinas sa Kongreso na nagtitipon:

SEKSIYON 1. Ang konstruksiyon ng mga touirsm centers sa Unang Distrito ng Nueva Ecija, partikular sa mga bayan ng Aliaga, Guimba, Licab, Cuyapo, Nampicuan, Sto. Domingo, Zaragosa, Quezon at Talavera ay isasagawa ng Department of Tourism sa koordinasyon ng mga kinauukulang yunit ng lokal na gobyerno.

SEKSIYON 2. Ang halagang Limang Milyong Piso (Php5,000,000.00) ay inilalaan ngayon para sa layuning ito, at ikinakarga sa pondo ng Department of Tourism.

SEKSIYON 3. Pagkabisa – Ang batas na ito ay magkakabisa labinlimang (15) araw pagkatapos na ito ay malathala sa dalawa (2) man lamang na pahayagan ng malawakang sirkulasyon.


Pinagtibay,